利物浦強“宮”三分

【本報消息】英超周中快車今晚有利物浦主場鬥水晶宮，紅軍復賽第一擊出閘脫腳和波而回，面對狀態不俗的水晶宮，主場三分唔易到手。

利物浦復賽第一擊鬥愛華頓，空有控球卻欠奉威脅埋門，最終失分而回，暫領先次席曼城二十分，首奪英超冠軍仍需努力。只是，守將米拿、馬迪普上場勇戰受傷，羅拔臣又因傷上陣成疑，左閘兵荒或成對手突破缺口。前場費明奴、文尼及南野拓實狀態未操起，沙拿能否趕及傷癒左右勝負大局。幸晏菲路主場聯賽跨季已五十五場不敗，且雲迪克、艾利臣領軍的後防僅失廿一球固若金湯，即使紅軍狀態一般又鬧兵荒，主場出擊仍睇高半線。水晶宮復賽首戰擊敗般尼茅夫，聯賽錄得四連勝兼一球不失，暫積四十二分排第九位，與歐戰資格僅四分距離，戰意同樣十足。只是，球隊近六鬥紅軍全敗而回，且今季客場勝和負各五戰績平平，此番客戰不敗離場已完成任務。

亨隊：硬仗一場

紅軍隊長亨達臣未敢輕敵：“英超每仗比賽都好難踢，每家球會都十分出色。水晶宮上場表現優秀，今場肯定惡戰難免，己隊需要盡全力爭勝。我們希望做到最好，贏下比賽，最終贏得冠軍，希望能夠盡可能贏得餘下比賽。”