凍豆腐

凍豆腐就唔係單純指冰凍嘅豆腐，而係內部結構呈蜂巢狀嘅一款豆腐，平時我哋打邊爐都好常會食到，貪佢最吸湯汁，豆味又比普通滑豆腐濃郁。以前北方人冬天時會專登買豆腐返嚟，放喺屋外過夜，就會自動變成凍豆腐；我哋當然都可以照辦煮碗自己動手做，將豆腐擺喺冰格過夜，然後倒走多餘水份就可以。老周我建議大家買水份最多嘅嫩豆腐，雪出嚟嘅成品蜂巢洞分佈較為平均，吸湯能力更強。

天口熱，平時大魚大肉嘅都市人係時候食清淡啲，所以今期分享一道較清淡嘅家常凍豆腐素菜式，等大家平衡一吓飲食。材料有：凍豆腐一板、鮮草菇二両、菜心四棵、蠔油一湯匙、上湯半碗、麻油一茶匙、生粉一湯匙、生抽一茶匙、鹽適量。做法：將凍豆腐切成骨牌形，落鑊煎香備用；鮮菇用水加半湯匙鹽出一出水備用；菜心用作伴碟，灼熟後可先放喺碟上。然後將上湯倒落鑊，加入煎好嘅豆腐、鮮菇同調味料，煮滾後落生粉水打個芡就完成，上碟時鋪喺菜心上面即可。

周 中

（澳門美高梅金殿堂烹飪顧問）