生於和平皆有福

二次大戰盟軍對納粹德國最激烈一戰，七十六年前今日於法國諾曼第海灘上演，其代號“D-day”。此戰打得慘烈，卻係二戰扭轉戰局重要一役，足以一報英法聯軍在鄧苟克被困之仇。

今人有福，生於和平。然戰爭殘酷，則有影片留痕。縱觀史上紀錄片，戰況激烈，將士捐軀，在所不辭。鏡頭珍貴，戰地記者皆以血肉換來，雖時隔數十載，如今觀之，仍覺凝重。

五十幾年前，荷里活曾拍《碧血長天》，重現當年戰事，老牌牛仔尊榮掛頭牌，行行企企，獨攬風騷；片中大牌如雲，淨睇明星亦夠矣。一如片名，此片認真夠長，映足三個鐘，中場有休息，畀觀眾去厠所。

史提芬史匹堡年前拍《雷霆救兵》，前半段將諾曼第搶灘玩到盡。佢鏡頭下，槍林彈雨，血肉橫飛，盡顯“殘酷”二字。得現代科技之先，觀者有如親臨戰場，幾乎要閃身避槍彈，得感戰事之慘烈。

西門公子