車壇停戰幾個月

再無比賽車隊摺

澳門賽車仍有望

強手或缺減鋒芒

德甲足球賽率先開波，其餘意甲、英超、法甲躍躍欲試，但都得個講字，皆因疫情稍緩和，恐隨時反彈從頭來過。

賽車停頓多月，僅有北美房車在鑊型車場閉門復賽。若按正常上演，賽場萬千車迷身處大染缸，群集易中招。較早時曾傳一級方程式七月復賽，惟未有最新消息，都在估估吓，相信今個月會有公佈。

賽車同職業足球賽情況相若，都會迫住在無觀眾下進行。這牽涉到贊助及電視轉播等問題，再不比賽，車隊冇收入，會陷財困，甚至倒閉。車隊人員冇糧出，同樣凍薪或唔見一大截。故而賽車組織及車隊都有意願復賽，閉門都要砌。只要一級方程式賽牽頭，相信其他賽事會陸續展開。

今屆澳門大賽車又如何？鑑於賽事在十一月舉行，尚有時間“買定離手”。體育局較早時透露，很多國際賽事如世界房車賽停頓，即使復辦，亦因賽季問題未必會在亞洲舉行。局方會考慮邀請更多東南亞、大灣區車手，相信仍會有一定數量的歐洲車手參戰。

車迷最期望的，重頭戲F3能上演，若少這瓣，賽事失色，始終是歷年大賽車最刺激的比賽。沒有世房賽無妨，但勿連GT世界盃冇埋，車迷損失欣賞超跑的機會。

亦有車迷話，海外地區疫情未除，來澳車手須檢疫，比賽若閉門，那就冇氣氛，無謂勞師動眾了，就算停一屆，市民無意見。

大賽車係澳門品牌，都希望繼續辦下去。不過澳門無賽車場，僅有街道跑道，每年搞賽車都要鋪路封欄搭看台，大工程也，對民生造成一定影響。如果比賽全無號召力，觀眾稀疏，又要花大筆公帑，那就要執生，諗過度過矣！

羅倫斯