千億皇帝重溫美夢

今日六場草戰出馬不多，暗湧重重，兵兇戰危局面，又係爆冷格局，投注要執生。今季練者爭冠形勢激烈，馮耀正頭馬一直拋開對手，但近期成績緩進。今仗兩駒參戰，論馬要贏不易，至多位置。反而張兆煊廄今仗三駒匹匹精品，臨場吼緊。

張兆煊廄現排名中游，爭冠無望。旗下馬匹沉寂一輪後，本月勝出“峰飛騰”及“魁隆”兩W，馬房頹氣盡消。季尾兆廄馬回氣後普遍已有起色。今仗精品上陣，睇環境要開殺戒，馬迷捧場可細心推敲。

第三場：二班千五米。“千億皇帝”上仗千二米用牌仔無功而返。騎者未盡發揮，敗不為據。拚後小休重新打磨，狀態續有進步。馬匹質新未用盡，跑同程起家，今次路有專長不同計。復配老搭檔何華麟有勝績支持，人馬可重溫美夢。

第四場：三班千二米。“江河壹寶”上仗千八米敗得一塌糊塗。拚後匆匆再來，今次縮程搏殺，起用高君濤掛帥應不同凡響。此駒遇強愈強，直路鬥後勁煞食。恃磅輕兼人強，隨時一網打盡。

第五場：三班千二米。“杏木”質新馬台型不俗，上仗同程闖入冷位，走勢轉好。此駒拼後復課再磨，廄中人悉心打理下狀態續冒。操好再來搏殺，易配近期手風正順的蔡義武配搭不俗，此子拼勁十足，憑馬勇磅輕，可搗亂大局。