志仔鮮生再下一城

余健雄近期排名下跌，騎師榜首地位已被高君濤取代。此子要反先亦唔易，事關高君濤連仗勇得交關，起孖或中三元家常便飯，今仗座騎仍惡氣十足，有機起孖。

高君濤本地五屆冠軍，失落寶座兩年。今季馬雅離去少個勁敵，重拾冠軍呼聲至高。高君濤單於五月摘取十W，氣勢如虹。今仗手上多精品，擺明要搏殺，買馬跟紅頂白，此子座騎可優先考慮。

第一場：四班千二米。“志仔鮮生”上仗首配高君濤即開齋，贏來全無敵手，可見騎者技高一籌。拼後復課再磨，狀態有升無跌。續由高君濤操刀，幕後有意替此駒謀添食。今升班驟減十二磅，形勢依然有利。憑馬匹銳利前速，出閘放順可再下一城。

第三場：一二班千二米。“靠譜少爺”千二米實力夠強，論賽績數一數二，一向負頂重磅出戰亦夠殺。今次只負一百二十磅，佔盡優勢。此駒同高君濤最夾檔。上仗拚後重新打磨，此番復跑千二米正合腳法。高君濤熟手操刀，有力勝回一仗。

第六場：三四班千五米。“珍珠強勁”季內屢拼未能出頭，但評分已減，居此組絕不吃虧。上仗千八米遇強手飲恨梗頸，表現未算差。拚後操磨甚力，今番加強配搭再來。用高君濤主轡不會無的放矢。此駒跟得鬥得，憑路合人強，可一網打盡。