顏卓靈自資拍片籲戴口罩

藝人顏卓靈(Cherry)最近自編自導自演自資拍攝的呼籲戴口罩短片，在社交平台播出後收到相當大的迴響，吳彥祖、薛凱琪、方力申及導演彭秀慧等都幫手轉發，甚至有人因為看了短片而戴上口罩，此舉令Cherry感嘆“辛苦得來都好有價值”。

現正旅居澳洲的Cherry透露拍攝短片的原因，是因為看到澳洲有九成九的人唔戴口罩：“我見到佢哋真係好擔心！自從新冠肺炎在全球大流行後，香港有九成九的人戴上口罩，因為香港人經歷過‘沙士’的慘痛教訓。不過外國人習慣有病先戴口罩，所以我好想話畀佢哋聽戴口罩的重要性。”

由於Cherry是單人匹馬完成一個短片的製作，有相當大難度，她說：“我只係一個演員，又唔係導演、又唔係編劇、更加唔係專業人士，可以點拍呢？中間有過好多次掙扎，不過心裡面一直有把聲，要我必須去做！”為令短片效果增加吸引力，Cherry特別用扮鬼扮馬的輕鬆手法拍攝，在社交網推出第一日已得到一對外國男女的迴響。Cherry興奮地說：“佢哋話見到我條片，所以決定戴口罩，仲寄返戴口罩的照片畀我，我真係好開心！希望一傳十、十傳百，人人都戴口罩，保護自己的同時，亦保護其他人！”