瑤柱釀瓜環

話咁快夏天就嚟到，過去呢個星期十分之炎熱，出一出街都大汗疊細汗，咁就代表又到咗瓜菜當造嘅時候。坊間有話“不時不食”，食在當造時最好不過，好似節瓜、冬瓜呢啲瓜菜，消暑清熱，炎炎夏日食就最啱。今期老周我同大家分享吓好多時去飲宴食到嘅“瑤柱釀節瓜環”，其實喺屋企都好容易整到，材料亦唔太複雜，大家不妨一齊喺屋企試吓。

材料有：瑤柱八粒，節瓜兩條，菠菜四両，鷄湯半碗，蠔油一湯匙，老抽一茶匙，胡椒粉少許，花雕酒一湯匙，生粉兩湯匙，薑片兩片，菠菜適量。做法：先將瑤柱用清水稍微浸過瑤柱表面，加入薑同花雕酒蒸約一小時，蒸好後取出放涼備用。將節瓜去皮，切成八件再去籽，然後將瑤柱小心放入瓜環中心，倒入雞湯，蒸約半小時取出。用菠菜灼熟放底，瓜環放面，節瓜湯加調味料，生粉打芡淋上瓜環面即可。提提大家，瑤柱可以揀返大粒啲、完整少少嘅，出嚟嘅成品就更好睇啦。

周 中

（澳門美高梅金殿堂烹飪顧問）