昨日賽事總投注逾四百八十萬

李家輝高君濤捧盃

昨天草地賽事完結，六場總投注四百八十三萬四千元。

頭場十四匹未勝出馬跑千二米。短途快鬥快，高君濤騎適廄“阿努納奇”，排十三檔出閘以快打慢，迅速搶先帶頭。沿途節節領先，一口氣直放到底，爆六倍半冷。此駒季內多仗未出頭，今次起用高君濤操刀發揮上佳水準，贏至對手無力招架，替馬匹開齋。王君適戰駒季內交高君濤主轡多有好表現，“阿努納奇”今次贏馬騎者居功不少。此路人馬日後堪重視。

第二場黎昌全爆冷贏劉志森廄“澳門好”。此雙人馬上次跑沙地短途無功而回，敗後原裝配搭易地再戰。今次草地千五米執到一檔好位，人馬表現截然不同。一條直路殺上，贏至對手無力抵擋，十五倍冷W順利得勝。黎昌全、劉志森騎練齊添進帳。

第三場高君濤起孖兼贏“打吡預賽”。李家輝旗下“輝煌昇”憑留放後上挫敵。此駒連仗在高君濤胯下，不勝則位表現穩定。今次原裝人馬出戰“打吡預賽”，騎者發揮水準，埋門將對手一網打盡，爆十二倍冷W，率先替馬匹取得打吡入場券。李家輝捧走奬盃，高君濤中兩元，收穫不俗。

第四場李家輝廄起孖。練者第三場捧走“打吡預賽”奬盃乘勝追撃，旗下“康安之星”由何華麟掛帥，以輕鬆姿態取勝。此雙人馬上次爆完大冷再來，今次跑草地千二米臨場捧成大熱不足兩倍。但跑完後獨贏彈上六倍分頭不俗，何華麟人馬取得連捷。李家輝是仗捧盃兼起孖，季內最醒一日。

第五場張志立爆冷贏浩廄“金福將”。此駒上次陳卓鋒跑沙地落敗而回，今次轉跑草地千八米用牌仔張志立減磅搏殺，騎者交出水準替馬匹勝回一仗。“金福將”轉倉後贏馬，練者有交代，騎者亦居功。

尾場何華麟勝出輝廄“妙算威龍”，本替馬房完成三元任務。但賽後跑第二名的“速遞良駒”鮑羅素抗議其頭馬資格。及後經競賽小組研判抗議有效。“妙算威龍”頭馬被貶為亞軍，令投注此駒者見財化水。“速遞良駒”升上冠軍，獨贏派逾二百六，捧場者有運。鮑羅素食尾餬，王君適廄起孖寶埋齋。