睇過氣拳王傳記片

張兆輝林雪變喊包

由導演周顯揚監製執導、監製杜致朗編劇、韓庚擔大旗，描述過氣拳王為鼓勵患病女兒重拾勇氣重生的《我們永不言棄》，在內地口碑票房不俗。一向形象硬朗的林雪和張兆輝，睇完該片後不約而同說：“因為我係一個爸爸，所以我特別身同感受！”二人看完溫情優先場後，齊齊對記者說入場後十五分鐘開始，已經忍不住流淚。

睇完電影之後的張兆輝，眼濕濕地說：“我都係一個爸爸，如果有一個咁聽話嘅女，就冇嘢唔成功啦，套戲故事好寫實，賺人熱淚，一路睇感覺一路提醒人做嘢唔好放棄。如果我有個咁好嘅女就好囉，佢好好戲。我覺得一家大細都好適合入場睇，可以激發起大家嗰份鬥心。”

剛除掉被眼淚浸濕口罩的林雪說：“我要休息一陣，平復一下心情。忍喊忍得好辛苦，睇咗十五分鐘就開始想喊，父女情嘅情節真係好催淚，好感動，我喊到個口罩濕晒，而家要換個新嘅。如果事前知道咁催淚，我帶多幾個口罩出嚟啦。我都係一個爸爸，所以我特別身同感受，我特別鍾意佢嗰句‘這一秒不放棄，下一秒就有希望’，我覺得大人同細路都一樣，唔好放棄，爸爸永遠喺你身邊、支持你！我覺得套戲好人性化，喺呢個疫情時期中真係好啱，香港人唔好放棄！”

監製導演周顯揚說，拍攝本片時本來就想將它獻給全世界的母親及女兒，他說：“也希望藉着呢部戲嘅信念，為全港市民加油打氣，同心抗疫。”而面對觀眾如此熱情愛戴，周顯揚也感到十分鼓舞，他說：“知道觀眾喜歡及感動，我心情都興奮又激動，我拍呢套電影就係想傳揚愛心。電影雖然有刺激的動作場面，但戲中拳王和患病女兒（蔡書靈飾演）的親情才是戲肉。我身為一個父親，好想藉住呢套勵志電影，表達到只要可以鼓勵到女兒，一個父親係任何事都願意去做。生命就像一場拳擊，這一秒不放棄，下一秒就有希望。希望全港市民都感覺到創作團隊這份心意。”