瑤柱冬瓜雙雞湯

呢排澳門、香港同內地嘅疫情有放緩嘅跡象，但始終其他地區嘅情況都仲係好嚴重，所以奉勸各位都係唔好咁快掉以輕心，保持身心健康，繼續定時強身健體。飲食方面，可以煲返多啲清潤嘅湯水，除咗可以潤肺之外，仲可以抗病毒、預防感冒、健脾胃。

今期老周我就想同大家分享呢道“瑤柱冬瓜雙雞湯”。“雙雞”係指普通嘅雞同田雞，其中田雞營養豐富，有補元氣、治脾虛嘅功用；仲可以潤澤肌膚，可以加強身體免疫力。另外，冬瓜保健功效都唔可以睇少，潤肺生津，化痰止渴，仲清熱祛暑，宜家天氣開始熱，飲返啲冬瓜湯水可以令身體舒服啲。

材料有：瑤柱四粒、冬瓜半斤、雞半隻、田雞兩隻、陳皮一片、薑兩片，以及茨實、蓮子同薏米共二両。做法：將冬瓜去籽，連皮切大角形備用；田雞同雞一齊切件，清洗乾淨再出一出水；將所有材料放入煲內，中火煲約一個半鐘，飲之前加鹽調味即可。

（澳門美高梅金殿堂烹飪顧問）

周 中