昨夜賽總投注逾四百〇九萬

兆廄起孖俊廄頭尾餬

昨晚六場沙地賽事順利完結，馬會公佈總投注額四百〇九萬七千元。

頭場開始即爆大冷。田中正一騎陳俊輝廄“豪情駿馬”，以較佳留放挫敵。此駒服役後跑過多場未贏過，最叻一次得位置。近期連番落敗，計賽績嚇怕人。上次林凱摶輸後換人再戰，今次用田中正一操刀，發揮截然不同。贏來脫胎換骨，輕取對手多個身位，爆出近五百元大冷W，替馬匹開齋。“豪情駿馬”質素有限，今次贏馬環境造就，下次再來不宜追寶尾。田中正一、陳俊輝攜手拔頭籌。

第二場高君濤騎兆廄“峰飛騰”，埋門險勝余健雄“寶寶”。此雙人馬連仗搏殺入位，但未竟全功。今次增程跑千六米，憑高君濤較佳留放，同“寶寶”鬥至埋門，要影相分先後。結果險勝短馬頭，不足兩倍大熱W，贏來要食驚風散。高君濤贏馬，兆廄打破月來無馬贏悶局。

第三場公眾熱門“聖靈之都”大熱倒灶。高君濤憑錢廄“勝利皇星”喜中孖寶。此駒上次草地敗後再來，今次轉戰沙地，採留前鬥後戰術，埋門後上挫敗對手，替馬匹平反敗局。同場大冷馬“健而快”闖入連贏，Q派逾二千八中者和味。“聖靈之都”大熱門三甲不入輸得人多。高君濤二、三埸一口孖寶，龍虎榜上續領風騷。

第四場安萬堯復出贏馬。此子騎馮廄“悍勇駿駒”，以強勁衝刺後上掄元。此駒以跑中長途為拿手路程。上次短途得第六，途程根本嫌短。今次增程再戰，易配安萬堯主轡，騎者交足功課，替馬匹勝回一仗。馮耀正喜添頭馬，安萬堯亦居功。

第五場張兆煊廄起孖。旗下守齋馬“魁隆”由牌仔張志立主轡，以快放姿態將一眾大師傅座騎擒下，替馬匹取得來澳首場頭馬。“魁隆”季內屢拼未出頭，今次贏馬騎丶練居功不少。兆廄是晚一口孖寶收穫不俗。

尾場陳俊輝廄起孖食尾餬。旗下“喜晉”由中野省吾押陣，力拼下爆出二十倍冷W。此雙人馬上次千五米無功而回，今次跑沙地千三米贏得悅目，替馬房完成孖寶任务。陳俊輝喜食頭尾餬，收穫甚豐。