推新單曲作生日禮物

姜濤祈望疫情消退

姜濤今日正日生日，推出第四首個人單曲作為送給自己的生日禮物，MV今日在Mirror社交網站專頁首播。姜濤更希望在新冠肺炎疫情下，為樂迷帶來滿滿的正能量。

人氣組合Mirror繼成員Ian、Anson Lo、AK及Jer後，姜濤接棒成為第五位成員推出個人新歌《蒙着嘴說愛你》。該新單曲以疫情借題發揮，鼓勵大眾。姜濤分享道：“歌詞裡面鼓勵大家即使戴住口罩，都可以將想講的話講出來。不過，歌曲最想表達的，係依家遇到甚麼困難、甚或人生遇到甚麼困難都好，都應該堅持落去，因為冇咩係解決唔到的，包括呢個疫情。”

經理人花姐特別找來她的師傅、林嘉欣老公袁劍偉執導MV，組合Error成員肥仔更為MV編舞，Mirror隊友Lokman、AK、Anson Lo及Edan亦會於MV客串。姜濤解釋今次安排的原因：“Mirror有十二個人，疫情下唔希望太多人聚集一齊工作，所以隨機抽出幾個同我一齊拍。因為呢首曲唔係關乎我一個人的歌，而係關乎所有人的歌，所以都想多啲人參與。”

拍攝期間，眾人如非必要都嚴守一點五米距離，姜濤與肥仔不用埋位時更認真到用呼拉圈量度距離，場面搞笑。姜濤在一些小習慣上也略作改變以應付疫情，他說：“因為拍MV期間真係冇辦法戴口罩，所以盡量同人講說話都保持一定距離。飲嘢都只會飲自己的，冇搞錯，因為平時都會隨便飲其他人的，依家就唔會！另外仲有勤洗手，一停機有時間就會即刻洗手。”

姜濤透露由於疫情關係，近日除了工作都不會外出，就連Mirror隊友都好耐冇見。他說：“好多工作都停晒，所以拍呢個MV算係大家呢一個月以來第一次見。疫情期間，我試過最長逗留屋企一兩個禮拜。在屋企都係練歌，例如諗吓呢隻歌點樣表達歌詞。”新單曲於今日推出，成為姜濤“牛一”的慶生禮物。被問到生日願望時，姜濤表示希望疫情盡快減退。他說：“因為唔單止牽扯到更多人的生命安全，而且疫情快啲消退，大家就好快回復正常工作，可以盡快同大家見面。呢個都算係自私的願望，因為疫情好轉，有好多工作計劃就可以繼續進行。”