佳運金表現冇得頂

練者劉志森連季戰駒有限，馬房實力削弱，致成績下滑。練者識得部署，馬匹且戰且休，季內用完等回氣再用。近期出擊頻有戰功，繼前仗憑“佳運金”、“心中意”喜中孖寶，上仗“聖靈之都”摘取一W，連續兩周共取三W收穫不俗。現累計五場頭馬，龍虎榜排尾五。旗下鎮倉寶“聖靈之都”早排往港出戰失意於級際賽，拚後回澳即休養生息，上仗沙地短途，憑一條直路橫掃對手，贏來予取予攜。反映馬匹作戰水準復甦。“聖靈之都”在本地稱王稱霸，但說實在，此馬級數同港馬比較亦有差距，日後再赴港參賽，不宜期望過高。

周六草地賽又來。劉志森廄今仗三駒出戰，貴精不貴多，論馬實力亦夠殺起。不妨同大家逐一分析。第二場四班千五米，“鳳煌之星”上仗林凱操刀後上第三，馬匹走勢轉好。此駒早排連拚無功，看練者部署手法，陣上旨在減分。“鳳煌之星”年長後勁力有增，現跑千五米應最佳出路，今次續交林凱掛帥擺明再搏，唯排在不利十二檔，形勢輸蝕，只宜作冷門看待。第四場三班千二米，“聖靈大亨”初出插班而來，賽前準備充分，快試慢踱工夫做足。今配何華麟嫡系騎師主轡，不會無的放矢。此駒亦排在不利十二檔，且看騎者如何發揮，倘臨場票數硬朗仍堪重視。第六場四班千五米。“佳運金”季內連戰未出頭，上仗同程高君濤力拼開齋，人馬表現冇得頂。近期操練依然積極，周內高君濤連摸幾課，馬匹狀態有升無跌。“佳運金”開竅後續有進步，今番原裝配搭再戰原程，幕後要乘勝追擊。遇同組對手多不穩分子，又排一檔好位，論牌面佔優，此路人馬，值得再跟。