佩儀與梓軒隔空談情史

鄧佩儀(Gloria)與王梓軒飾演的“齋Sir”在上周二的劇集《機場特警》中開始發展戀情。Gloria一場喊爆戲，被網民激讚好演技。梓軒安慰她的表現亦大獲好評，獲讚暖男。目前身在洛杉磯的梓軒，日前就網約Gloria做IG直播，隔空炮製“四百咖啡”兼談情史。

在直播中，兩人都表示過往有唔少刻骨銘心的情史。梓軒自爆曾經寫情信向女仔示愛：“我好鍾意文字、好鍾意創作，我係有寫過情信！試過飛紙仔，將信摺到好似一隻飛機咁飛過去，亦試過摺埋張紙叫同學傳過去都有。”梓軒直言喜歡獨立自主的女性，同劇中的阿銀有幾分相似。Gloria笑言：“我同阿銀都好似！”

Gloria透露當年在外國讀書，因為全部都係用儲物櫃，冇人會寫情信，不過情人節就好特別：“大學時候每到情人節，學校有幾個學生會搞活動。如果你想送朵花同字條畀鍾意的人，但你又唔想被佢知，咁你畀錢就得，呢班人就會去女仔個課室送花。我每年都好期待有男仔送，但一次都冇收過。反而我有買花畀我暗戀的同學，但我冇寫係我。”Gloria自認係一個珍珠奶茶怪：“開心唔開心都會飲，如果想追我，得閒無事買畀我就會好窩心。”