昨日賽馬總投注逾四百七十萬

適譚兩廄同起孖

昨天草沙混合賽順利完結。馬會公佈總投注四百七十一萬五千元。

頭場開始即爆。高君濤騎馮廄守齋馬“添彩吉祥”憑快放擊敗大冷門“火星代表”，先拔頭籌。此駒連季出戰多仗未能贏馬，今次唞夠交高君濤搏殺。騎者肩負重任，不敢怠慢。出閘三扒兩撥搶先帶頭，全程一氣呵成走返，贏至對手無力招架，替馬匹打開來澳勝利之門。跑完獨贏有近五倍分頭不俗。冷馬“火星代表”闖入連贏，Q派逾千四，買中者和味。“添彩吉祥”開齋，練者有交代。高君濤功不可沒。

第二場牌仔張志立羸錢廄“如詩如畫”。此雙人馬上次跑入冷連贏，未竟全功。今次原裝配搭捲土重來，有幸抽到一檔出閘搶先貼欄，沿途且戰且走，入直路發力衝刺挫敗對手。跑完獨贏變大熱只派二十八元。“如詩如畫”今仗食雞糊補中，騎、練攜手添頭馬。

第三場輪到鮑羅素贏馬。此子騎王君適廄“靚到爆”，以較佳留放挫敗對手。此駒上次由安萬堯操刀取勝，今次贏完易配鮑羅素再戰。騎者接掌帥印交足功課，贏來無懈可擊，替馬匹取得連捷。同場安萬堯揀騎的“浩勝銀影”頂頭大熱孭晒飛，只跑第三為人作嫁。鮑羅素、王君適攜手贏馬。

第四場王君適廄喜中孖寶。旗下“英記好友”由中野省吾掛帥，後上險勝。此駒上次用黎家駒跑同程，只得梗頸四。今次走馬換將再來，中野省吾發揮水準，替馬匹勝回一仗。王君適一口冷孖收穫不俗，中野省吾亦居功。

第五場何華麟贏劉志森廄馬王“聖靈之都”。此駒早前往港征戰，回歸後首次上陣。今番跑沙地短途負頂磅，憑一條直路橫掃對手，替馬匹贏得久違的頭馬。練者喜添一W，何華麟復出後贏第二W。

第六場田中正一贏譚廐“搖滾小子”。此駒在澳服役未出頭，上次跑一三五○米敗後重來，今次加強配搭用田中正一搏殺。騎者表現賣力，埋門後上挫敵。馬匹開齋，騎、練居功。

尾場余健雄騎“豐收年”食尾糊兼替譚廐起孖。此駒上次初跑梗頸四，今次原裝配搭再來，余健雄打真軍力壓對手贏來驚險。“豐收年”開齋，譚廄起孖。