魚 唇

好多人都鍾意食名貴嘅花膠，貪有養顏補身功效，但其實咪又係魚類身體一部分。魚嘅其他部位，例如魚肚、魚骨咁，功效其實都差唔得幾多。老周我就推介大家食魚唇，點解？因為魚唇蘊含豐富膠質同蛋白質，有補虛潤肺功效，滋陰養顏，係平民最愛嘅補品之一。大家唔好以為魚唇即係魚嘅嘴，其實係指魚嘅尾部，係魚鰭同魚身之間嘅一片肉膜。魚唇身價雖然唔高，但同樣營養價值十足，係正宗價廉物美嘅食材。

今次老周我就想教大家整返味“紅燒魚唇”，做法一啲都唔複雜。材料有：亁魚唇半斤、冬菇八隻、冬筍二両、小唐菜八棵、雞湯一碗、蠔油兩湯匙、薑片四片、生葱兩棵、鹽半茶匙、糖一茶匙、生粉兩湯匙，仲有麻油同料酒少許。

做法：先將魚唇用熱水浸三十分鐘，洗淨切件，再放入薑葱水內煨十零分鐘，取出備用；起油鑊，落埋煨好嘅魚唇、雞湯、冬菇、冬筍、小唐菜同埋其餘調味料，燜約十五分鐘，最後用生粉打個芡，就可上碟。

周 中

（澳門美高梅金殿堂烹飪顧問）