昨夜賽投注額逾三百七十七萬

王君適余健雄起孖

澳馬昨晚復賽，馬會公佈總投注額三百七十七萬四千元。

是仗六場草沙混合賽，甫開場即爆個石破天驚。牌仔張志立騎馮廐“浩勝皇星”，以強橫後勁挫敵。此駒上次鮑羅素掛帥，跑沙地無功而回。今次轉戰草地用牌仔奇兵突襲，五十八倍大冷W，殺至對手一頸血。同場冷馬“忘不了”及“常讃美”分跑二、三名，Q派逾三千八，三重彩派六萬八中者和味。張志立、馮耀正攜手先拔頭籌。

第二場鮑羅素爆冷贏“又見冬祝”。此駒一向最夾高君濤，但此子未能造磅，故帥權落在鮑羅素手上。騎者初次接手出戰不敢怠慢，全程騎來賣力，直路以強勁衝刺直奔終點，替馬匹取得轉倉後首W。跑完獨贏有十二倍分頭不俗。李森贏馬交代。鮑羅素同練者合作擦出火花，此雙騎練日後值得吼緊。

第三場余健雄贏馬。此子騎適廄“東方盈悅”以快放本錢走返。此駒跑短途起家，今次跑一三五○米出閘快步搶先，三扒兩撥發力帶頭，沿途且放且走帶至終點，輕取對手多個身位。“東方盈悅”前速夠快，沙地腳法一流，成熟後可轉向中距離發展，料季内還有兩W在手。余健雄、王君適齊添頭馬。

第四場王君適廄同主馬爆冷起孖。練者於第三場贏完“東方盈悅”乘勝追擊，是場“東方盈喜”由蔡義武押陣，以較佳留放後上掄元。此駒沙地最佳出路，今次唞夠出戰，由蔡義武操刀爆冷，跑完獨贏有二十二倍，買中者好分。適廄同主馬一口孖寶和味，蔡義武功不可沒。

第五場何華麟復賽爆大冷贏馬。此子早排因傷缺陣多時，昨晚傷癒上陣。前半場無建樹，跑至此場騎輝廄“康安之星”，憑後勁埋門險勝對手。爆出一千二百餘元大冷W。同場“柏雪之寶”埋Q，派彩逾千九中者和味。何華麟、李家輝喜添進帳。

尾場余健雄起孖食尾糊。此子騎譚廐“大魔頭”埋門影相，險勝高君濤“幸運金”，贏得一口孖寶。“大魔頭”上仗贏後易配再來，今次用余健雄發揮上佳水準，替馬匹取得連捷。騎、練攜手食尾糊埋齋。