波係圓嘅成絕響

“波係圓嘅！”資深電視迷唔使諗：此乃伍晃榮！伍公此語廢話成經典，幽默入俗，街知巷聞。佢將球賽變成《笑笑小電影》，老少咸宜。每天新聞最後，如斯三幾分鐘，猶如餐後甜品，興味盎然，無可或缺。電視體育新聞報道由此獨創伍氏風格。

伍公乃澳門仔，九歲隨家人居港。中五畢業，因家貧無緣升學，友薦入英文報，開始記者生涯。佢英文麻麻，勝在用功，打麻將亦用英文叫餬。天道酬勤，終有所成。

伍公講體育頭頭是道，卻絕非其所好。然非其好而成眾人所好，佢自詡只為三樣嘢：我要食飯，我要發泄，我怕悶！其營金融業之子曾詢之曰：老竇，你每日只做三幾分鐘，認真嘆記！伍公正色曰：我日作十小時，最精彩三分鐘畀晒觀眾而已。

伍公善於觀象講古，金句輩出。射門唔入，佢話“守門員最好朋友係門柱”，觀眾自有會心微笑。十二年前今日，佢駕鶴西去，伍氏旁述，已成絕響。

西門公子