熱乾麵

前排成日喺網上見到網民講“熱乾麵加油”，原來係為受疫情影響嘅武漢打氣。熱乾麵聽就聽得多，唔知大家又食過未？佢係武漢最標誌性嘅早餐，去過武漢嘅朋友一定留意到當地人相當重視早餐文化，又稱之為“過早”，朝早一定會食返碗熱乾麵。

熱乾麵出身草根，睇落好似好平凡普通，其實佢係“中國五大名麵”之一，稱霸中國十大麵食之首，話佢係中國主食文化嘅代表都不失為過。一碗好嘅熱乾麵，麵條要夠纖細，根根有力，韌勁十足，撈埋麻油、芝麻醬、醬油、辣蘿蔔等嘅配料同調味。食之前，記得一定要“三轉九拌”，即“轉三下再拌九下”將麵條撈好，等每條麵條均勻蘸滿醬料，認真食過返尋味。

最近我哋酒店幾間中餐廳都做緊熱乾麵推廣，由經驗豐富嘅湖北廚師主理，用最傳統做法，味道正宗。師傅話我知，我哋碗麵嘅精髓在於由多種香料及藥材製成嘅秘製辣椒油，撈埋芝麻醬同爽口彈牙嘅麵條，冶味無比。大家如果想喺澳門試吓地道嘅熱乾麵，記得要嚟捧場呀！

（澳門美高梅金殿堂烹飪顧問）

周 中