陳明憙拍微電影獻初吻

唱作女歌手陳明憙早前與一班志同道合的朋友一起參與第七屆微電影“創＋作”支援計劃音樂篇，除擔任微電影女主角，更為電影度身訂造全新歌曲《再再見》，一手包辦曲、詞及主唱。

第一次拍微電影，便獻出熒幕初吻，明憙坦言最難搞實情是求婚戲份：“劇本講男主角同成班朋友夾埋激嬲我，之後突然出現跪地求婚，女主角情緒變化比較複雜。加上現實生活中，我未試過被求婚，只係擔心做得唔夠好。導演講到明，那場吻戲只會拍兩個鏡頭，其實係壓力多於尷尬。反而男主角李匡翹好紳士，問我需唔需要借位拍。雖然今次拍攝只有短短三日時間，不過都好難忘，因為我的角色有少少奸，為了自己鍾意的男仔不擇手段，對我來講好大挑戰！”

一直喜歡創作的陳明憙今次亦負責演唱主題曲《再再見》，已在四月初派台，她十分期待新歌播放率比較早前的新作《遊樂》更上一層樓：“之前《遊樂》上到流行榜三甲位置，我好開心，但呢段時間為防疫，避免加重醫療負擔，大家都留在屋企，雖然唔可以好似之前咁跑電台為新歌宣傳，但我會多些利用互聯網，同大家分享我的音樂。”