胡渭康以歌聲悼念哥哥

今日是一代巨星張國榮（哥哥）離世十七周年的日子，新冠肺炎疫情下，所有悼念活動取消。曾經跟哥哥同一唱片公司的胡渭康，就以歌聲來悼念故友。

近日胡渭康應邀在一個紀念音樂節目中，自彈自唱哥哥的經典歌曲《追》。他說：“《追》是哥哥一首經典歌曲，很難唱，令我很有壓力。加上當晚我演出的座位，之前係黎小田坐的，覺得佢哋好似畀緊力量我，好彩在大家幫助下，最後一Take過完成演出，令我放下心頭大石。”

胡渭康八十年代出道，與哥哥同屬華星唱片公司，經常都會見面。談到對哥哥的印象，他有讚冇彈：“哥哥個人好似對任何嘢都唔緊張，但工作好認真。有次佢睇完我上節目唱歌，佢覺得我有一隻字可以唱得更好，就打電話叫我下次要留意，又教我唱歌時點樣可以有型，感覺好好。記得當時唱片公司除了有哥哥，仲有梅姐同呂方等好多勁人，哥哥同梅姐就好似大哥哥、大姐姐，好照顧我哋一班新人。（在他們身上有咩學到？）最大得着係學到工作要認真、玩就要盡情去玩。”