秀文想約阿Bob拍寫真

林盛斌 (Bob)、張秀文及楊明昨日拍攝遊戲節目《你估我唔到》，Bob透露節目共有十三集，下星期會拍攝最後一集，希望疫情盡快過去，生活重拾正軌。

Bob表示在疫情下仍有工開，又不用周圍去拍攝，只在公司與同事玩遊戲，還可以星期日畀一家大細睇得開心，真是十分感恩。問到之後有何工作？他說：“之前拍過兩個網上廣告，好多人都話羨慕，我都形容為甘露。（婚禮司儀工作全部取消？）取消晒，十單八單一定有，連同周年晚會同商演，呢幾個月有廿個活動已取消。”

張秀文指拍攝這個節目已成為生活重心：“一星期拍一日，跟住就等睇播出。好幸運仲有少少渣拿、有少少生活動力。”除了錄節目，秀文透露每日就是不停執屋及洗衫來打發時間：“我要積極搵嘢做，因為工作都押後到六月。依家日日留在屋企，本來諗住約攝影師影輯靚相，但依家都係唔敢影住。”她笑指可以找阿Bob當攝影師幫她影相，Bob就表示要先問准老婆。