春天食春卷

啱啱就過咗春分，意味着大地正式回春，百花齊放。成日聽人講話春天要食春卷，呢個習俗嘅起源有好多說法，其中一個說法就係話同養蠶蟲有密切嘅關係。以前養蠶嘅人以蠶蟲脫繭嘅形態為靈感，用麵粉搓成形似蠶蟲狀嘅食物，以祈求嚟緊一年蠶業豐收嘅意思。

最近可能大家都唔太經常出街食飯，所以老周我就繼續同大家介紹多幾味住家菜，等大家都可以試煮多啲唔同嘅菜式。其實自己喺屋企動手做春卷亦十分簡單，除咗可以自己整春卷皮，去超市買現成春卷皮返嚟又得。我自己就鍾意落竹筍絲、香菇絲、肉絲同甘筍絲嚟做餡，加蠔油、麻油、鹽等簡單調味；當然可以擺其他自己鍾意嘅餡料，或者加減啲調味料都一樣得。

醃好嘅餡料先落油鑊炒一炒，放涼備用；將適量嘅餡料鋪喺春卷皮中間，卷成大小適中嘅圓條形，用麵槳封好口之後落滾油，用中火炸至金黃色，就可以撈起上碟。炸春卷香脆可口，十分冶味，包保屋企嘅大人細路都會捧場。

周 中（澳門美高梅金殿堂烹飪顧問）