昨日賽馬總投注逾三百六十六萬

摩利高安萬堯同起孖

昨日草地賽事順利完結。馬會公佈總投注三百六十六萬三千元。

是仗出馬踴躍，角逐過程激烈，賽果連場爆冷，熱門客不易得甜頭。頭場開始即爆。安萬堯騎高廄“浩勝精綵”先拔頭籌。此駒上次千二米安萬堯掛帥，跑梗頸無功而還。拼後原裝人馬再戰原程。騎者今次打醒十二分精神，出閘守好位，入直路一攻而破，替馬匹開齋。“浩勝精綵”質新當起，下次再來可重視。安萬堯、摩利高齊添頭馬。

第二場田中正一開糊，騎譚廐“水果茶”後上爆冷。此駒季內多仗無建樹，上次林凱跑沙地短途點滴全無。今次移師草地千八米大變身，贏來判若兩駒。“水果茶”開齋田中正一居功不小。譚文就廐喜添頭馬。

第三場牌仔張志立騎錢廄“大魔頭”，以大熱姿態贏馬。此駒上次同程搏殺得第二，未竟全功。今次原配再戰，遇馬少場合對手減少。張志立謹慎從事，埋門魚生粥險勝“聯安神將”，替馬匹補中。“大魔王”跑完獨贏只得三倍，被人大注扑中。

第四場黎家駒復出做替工，爆浩廐“乾卦”五十三倍大冷W。此駒本由任布利出戰，但騎者因未能造磅，故臨時改配黎家駒主轡。此子餓馬多時砌到盡，出閘由頭帶到尾，爆個不亦樂乎。“乾卦”上次沙地大敗，今次易地增程，跑千八米贏來生猛。黎家駒、梁國浩齊添頭馬。

第五場安萬堯、摩利高攜手起孖。此雙騎練頭場勝出“浩勝精綵”氣勢正盛。是場同主馬“浩勝銀影”再度攜手出擊順利得勝。此駒上次初出沙地落敗。今次轉戰草地千二米，出閘快放守好位，全程一氣呵成放返，替馬匹開齋。“浩勝銀影” 質新勇進，料季內可再添頭馬。

尾場林凱食尾糊。此子騎陳俊輝廐“鉻合金”，以強橫後勁挫敵。此駒上次短途落敗，今次回班增程再拼，雖然負重磅出擊，但贏來兵不血刄。騎、練攜手食尾糊埋齋。