與阿旦因戲結父女緣

鄧月平炮製愛心魚湯

鄭丹瑞日前拍攝網片，邀請鄧月平擔任嘉賓，她除了帶來特別自製的甜品外，更現場親自下廚，炮製愛心魚湯孝敬這位“哎吔老竇”。

“阿旦”鄭丹瑞與鄧月平( Larine )三年多前在電影《小男人周記3之吾家有喜》中飾演“梁寬父女”初結片緣，時至今日，兩人依然感情甚篤。阿旦日前拍攝網片，當然邀來Larine任嘉賓，親手炮製一道名為“雪山飄雪”的愛心魚湯。

Larine 洗切材料期間，阿旦就在一旁睇住，“兩父女”一時互窒一時講笑，非常有默契。最搞笑係 Larine 問阿旦識唔識開生粉水？極少下廚的阿旦即笑罵她：“我來食嘢咋，開咩生粉呀？”但他跟住又煲水又開生粉水，聽晒“囡囡”話。阿旦又讚 Larine 刀功好，更憶述以前拍《高朋滿座》時拍的廚房戲：“在拍前兩小時才跟廚師學用刀，可惜一開機就切親手，搞到一灘血，我依家都驚呀！所以呢啲粗重嘢，我老人家都係唔做啦，搵我呢個女啦。”阿旦更重提當年試鏡揀中 Larine 拍《小男人3》的趣事，令 Larine 聽到哈哈笑。

“雪山飄雪”其實係黃魚湯，魚肉是白色、煲好的魚湯亦是白色，所以 Larine 起了這個名堂。這鍋湯的特色是一湯三味，除了魚湯味道外，還有加荽茜水及混合花椒油芝麻油的另外兩種味道，相當有心思。Larine 說：“呢個係心機湯，唔簡單得來又健康，食材幾清淡又有營養豐富，好適合旦哥飲。”

當日拍攝尾聲，就由阿旦親嘗Larine的三味黃魚湯，他大讚合胃口，笑言開心滿足到揼檯。Larine 說：“旦哥讚我的魚湯好飲、甜品好食，我感動到想喊。因為旦哥係一個對食幾有要求的人，得到佢認同讚賞，係對我的一個肯定。我會煮多啲畀佢食，因為拍《小男人》時，我應承旦哥煮嘢畀佢食，只係當時拍攝時間太趕，一直未有機會。”

Larine透露旦哥每年都有請飲開年茶，今年只因疫症爆發未有相約，直至這次拍攝終於聚頭。她說：“我覺得旦哥係我貴人、吉星，因為每次見旦哥前後，我都會爆Job。見到佢好興奮、開心到失控，佢真係一個好好的前輩。”