謙謙疫境拍劇壓力大

家有待產妻子楊怡，羅仲謙疫境拍劇，如臨大敵似的。女助手隨時奉上酒精搓手液、消毒紙巾、口罩，不時遞上暖水壺，潤吓喉嚨。“快要做爸爸了，實驚啦，有時瞓醒喉嚨乾乾哋，心諗大鑊嘞，自己嚇自己，好大壓力。如果有幾聲咳，會分房瞓……”謙謙與楊怡已商訂好防疫防到床上，諗定在將軍澳租酒店住。“好彩，呢套劇冇咀戲，阿怡反而擔心我拍打戲，因為有些場口要打到瞓落地。”

謙謙拍劇時，自備私家碗筷，遠離大隊開餐，“食劇組飯盒，安心過在餐廳食飯……”偏偏外景就在一間餐廳內，十幾個劇組人員焗於幾百呎內，演員相距不夠一米講對白。劇情講鄧佩儀幫謙謙按肩頸，又餵他食魚蛋，咁緊密身體接觸，好大風險喎。因此，謙謙每次返到屋企，入門口前都自我消毒，入屋即除衫、沖涼、洗衫……

謙謙自爆開始胎教了，用溫柔語氣同BB傾偈：“BB呀，今日食咗乜呀？”又講《三隻小豬》故事，並跟楊怡一起哼唱兒歌。“ BB係我爸爸第一個孫，會由長輩改名。”BB是否長子嫡孫？謙謙口快快：“唔係！即係點講呢？只係第一個孫輩。（唔係長子嫡孫，即係孫女？）我諗緊我係唔係長子，我屋企好多人。”

“楊怡陀B都OK，冇乜唔舒服。只係變得好大食。”謙謙笑説：“夜晩我返到屋企，要煮宵夜佢食，怕佢行來行去……還有，大肚婆要打側瞓，又會腰痠骨痛，唯有幫她按頸、按腳、鬆骨。”

談到拍劇時鄧佩儀為他按頸、肩，餵魚蛋，謙謙説講個信字，“佢信我，我信佢，做好本份。開工前都有先探體溫，公司的安全意識都提高咗。”鄧佩儀補充：“公司的道具用漂白水抹過，碗魚蛋粉都經高溫再煮，要令拍檔安心，各人都要保持個人衛生。”無論如何保重，疫情下難免有憾——謙謙本想親自剪臍帶，但疫情下應該冇得入產房了。

高 梁