聯安之寶操足應戰

今季少了馬雅此位冠軍人物，騎師買少見少，競爭更趨激烈。目前龍虎榜前三位者，只相差三、四場頭馬。余健雄季內暫領風騷，賽至埋尾可否奪冠未知。此子騎功及支持度不差，圈中人對其爭冠軍仍然睇好。現除前領余健雄、高君濤、恩利克、鮑羅素、安萬堯及何華麟較具分量，其餘過江龍多屬遊埠性質，惟際遇各不同。菲將杜樂天來澳騎了幾次未贏馬，守齋多期後自動棄牌，走夾唔唞。日將田中正一於一月份來客串，期間座騎有限，兼屢拚不逞，但此子守得住陣腳，待至前仗終憑賀廄“聯安興城”爆冷開齋，總算守得雲開見月明。田中正一騎功未算標青，勝在陣上肯拚，其跑入三甲的座騎，不少屬下風馬，且有較佳賠率。田中正一季內出戰三十六場，共獲一冠五亞三季，計上名率不差，此類二線冷殺手騎師，練者喜歡用作出擊，取其不會太過孭飛。練者賀蘭杜夫今季所贏二十一場頭馬，多交由洋騎師將操刀，日將中野省吾及田中正一亦有效勞，其餘華將鮮有交易。由此反映，賀廄用人別具一格。田中正一前仗“聯安興城”替馬房建功。騎者此役交到功課，周日再同賀廄合作，此路人馬還須看重。

周日第二場二三班千二米，賀廄“聯安之寶”上季共取一勝六位。但馬匹用得多評分高企，練者要替牠減分再搏，故今季多仗無功而回。此駒已連敗五場，由七十四分減至現時六十二分，今於二三班混戰，計馬實力稍超。草地千五米最佳，跑千二米亦合發揮。“聯安之寶”近期勤加打磨操足應戰。今仗帥權落在田中正一手上，騎者開齋後信心大增，周日夠鐘起筷，不妨盯緊。