鄭俊弘拍新劇插曲MV

近期熱播的《法證先鋒Ⅳ》中，鄭俊弘(Fred)不單有份參演，更為劇集唱插曲《不要流淚》。Fred 謂：“《法證先鋒》呢部劇見證我的成長，今次再有份主演，仲可以為劇集唱歌，感覺好奇妙好開心。”

早前Fred為新歌拍攝 MV。MV以故事講述男人之間的兄弟情，大家圍埋一齊講車玩音樂、去酒吧 Happy Hour，令Fred回想起同幾個好朋友夾Band的日子。他笑說：“男人之間都會有小磨擦，但係兄弟唔會有隔夜仇，大家好簡單飲返杯、拍拍心口、心照就無事啦。”

這首歌在創作上有個新嘗試，編曲方面有一種歐陸感。Fred說：“作曲人張家誠話係一首充滿法國手風琴色彩的歌曲，我完全感受到那種好享受生活的寫意感覺。導演仲特登搵架古董車做道具，諗住我可以周圍遊車河，可惜我唔識開棍波車。”