《辣伙頭》大熱奪冠

鄧月平獲封女廚神

前晚，ViuTV綜藝節目《辣伙頭》進行決賽，由鄧月平、陳欣妍、余逸思角逐，三人分別要在兩個小時內炮製頭盤、主菜、甜品的套餐。結果鄧月平擊敗兩個對手贏得冠軍，獲封女廚神。

鄧月平這段日子連過十五關，擊敗七個對手，才登上冠軍寶座，她坦言：“拍攝期間安排好緊密，有時更一日拍十幾廿個鐘，其實台前幕後人員都好攰，雖然冠軍只有一個，但我覺得呢個榮耀係屬於他們、我們、你們的。呢個獎得來不易，以後我會更加謙虛努力應付每一個工作，特別多謝我的經理人。”

當晚，鄧月平炮製的頭盤是中式煎帶子伴分子大紅袍橙汁、主菜是辣味豬腩肉Pasta，甜品則為芝士伯爵茶蛋糕配四川幸運曲奇，相當創新。原來她是以自己作為菜式的主題：“因為我喺比賽入面曾經迷失過，但我撐落去，而今次嘅主題就係我自己。第一道餸係我畀人嘅感覺，第一啖食落去冰冰涼涼，我第一個畀人嘅感覺會係咁，但認識我嘅人會發現我熱情如火，所以主菜我整咗個辣嘅意大利麵，當然我都有甜的一面，於是在做甜品時，喺蛋糕裏面加咗大紅袍茶同埋伯爵茶作首尾呼應。”

在比賽過程中，鄧月平也不是一帆風順，主持人兼評判陶大宇就指她整的豬皮唔夠脆，令她露出失望之色，好彩她其他方面表現出色，最後都能奪得冠軍。鄧月平透露自從參加《辣伙頭》後，很多朋友及粉絲都問她攞食譜，並希望她開YouTube Channel教煮嘢食。她亦接受大家的建議，決定開YouTube Channel分享煮食心得，而且還與出版社洽談出食譜事宜。