紅桑子雞翼

雞翼大人細路都啱食，無論係煎、炒、煮、炸都有捧場客。最近非常時期，大家都少咗出街食飯，唔少朋友都寧願喺屋企花多啲時間煮吓飯仔，健康又安全。所以呢排我哋公司寫字樓啲靚女同事都問我有乜嘢簡單又美味嘅菜式可以介紹吓，令住家飯冇咁枯燥無味。

老周我見大家都喜歡食雞翼，今期我就教大家整一味開胃可口嘅“紅桑子雞翼”。做法十分簡單易學，材料一啲都唔複雜，係豉油雞翼、可樂雞翼、炸雞翼以外一個特別少少嘅新煮意。

材料有：雞翼一磅、紅桑子果醬一細樽、酒兩茶匙、鹽兩茶匙、生抽一湯匙、薑同葱適量。做法：將雞翼洗淨，用酒、鹽同生抽醃一個鐘；醃好嘅雞翼落油鑊煎到表皮金黃色，加少許水同紅桑子果醬，再煮多五分鐘，收水收得差唔多就可以上碟。呢道餸酸甜冶味，味道特別，送飯亦一流，包保屋企啲細路仔胃口大開，個個都爭住食。

（澳門美高梅金殿堂烹飪顧問）

周 中