疫境喜迎愛情結晶

雨僑陀B無酸不歡

昨日情人節，藝人雨僑和羅力威宣佈喜迎愛情結晶品，將會由二人世界變成三人家庭，走進人生新階段。

雨僑(Ava)與羅力威結婚兩年，昨日Ava在臉書宣告喜訊：“祝各位情人節快樂！兒女是耶和華所賜的產業，所懷的胎是祂所給的賞賜。感謝主賜給我們這個寶貴的小生命，不知道你會比較像爸爸還是媽媽呢？”她同時上載了與丈夫的童年照及一張兩人的近期合照，羅力威攬住一臉陶醉的Ava，相當甜蜜。

過去一個月，香港人活在“疫境”恐懼中，Ava形容此時懷孕是一個挑戰：“其實呢大半年唔止對孕婦係挑戰，香港人要好好生活本身就係一個挑戰；加上疫情蔓延，更多咗少少擔心，但係做媽咪幾時都擔心啦！經歷咗咁多，再迎接小生命，除咗好想畀佢一個快樂童年，我更加會要教佢做一個正直、善良、堅強的人。”

Ava透露現已陀B三個月，身體只有輕微不適，但口味就有變化，變成無酸不歡。她說：“頭三個月會有少少唔舒服，會突然間洗完頭起身好暈，嚇死我。不過唔嚴重，我知道冇嘔已唔算咩辛苦，食嘅方面就麻煩咗少少，日日要唔同口味，但只要都係酸嘅就開心。”問她陀仔定女？Ava表示無所謂，但稍後才會公佈BB性別。Ava現時大多數時間留家養胎，湊巧她主演的《性敢中環》在Viu TV播出，可以煲劇睇戲多個娛樂選擇。

首次升任父親，“愛妻號”羅力威當然緊張，除了開工之外，其餘時間都陪住太太。不過因為疫情問題，其實兩人已甚少出門。Ava說：“呢段時間冇乜點出過街，要產檢先去診所，戴口罩眼鏡及洗手係基本動作，老公更會戴手套負責幫我開門。與之前最大嘅分別，係老公依家學識煮飯，佢以前真係完全唔識！不過佢已經好努力，進步咗好多，依家佢煮嘅餸一啲都唔差。”