拍MV捉小朋友教戲

余香凝導演上身

余香凝近日再踩入歌壇，推出單曲《無得比》，更以才女姿態包辦作曲及構思部分MV內容，拍攝時不時指導小演員做戲，激發潛在導演魂，過足導演癮。

影壇新貴余香凝(Jennifer)演唱俱佳，足跡遍及歌影視圈的她，近日推出個人單曲，希望藉歌曲鼓勵聽眾欣賞自己，不要活在被比較的陰影之中。是次再度以歌手身份出發，Jennifer更以才女姿態包辦作曲，坦言歌曲取材自真實經驗：“《無得比》主要係講比較的心理，記得小學時有個同學彈琴好叻、讀書又好，媽咪經常同我講：你學吓人啦，點解你咁差？當時成日覺得自己好冇用。最近見返呢位舊同學，原來過咗咁多年，我仍然耿耿於懷，暗地裡想同對方比較，睇邊個更成功。我發現呢個心態好恐怖，所以要用呢首歌提醒自己，唔好成日同人比較，要相信每一個人都係獨特的。希望透過呢首歌，鼓勵大家多些欣賞同愛惜自己，相信自己係最完美。”

Jennifer日前亦為新歌拍攝MV，對演戲駕輕就熟的她，首次放下演員身份，專心夾Band唱歌：“第一次冇參與演戲部分，放手交畀其他演員去做，同公司的方珈悠都有參與拍攝，好多謝大家仗義幫忙！不過因為我緊張拍攝效果，所以一早就去咗睇佢拍攝。當中有個小朋友可能太細個，中途扭計跑走，我突然有種‘導演上身’的感覺，一路在鏡頭外教佢點做。呢個經驗幾特別，以後如果有機會，我都想執導自己MV，不過自知鏡頭處理方面唔係咁叻，所以希望可以合作導演。”

問到Jennifer屆時會否趁機“自肥”為自己安排與型男對戲？她竟自爆最想演“動作戲”：“如果真係有個男主角，我唔想做到好Sweet，反而希望可以同佢嗌交，甚至拍打交戲，咁樣拍出來的效果我反而仲興奮。”她亦發下豪語，寄望下次親自執導個人MV，朝導演之路進發。

適逢情人節將至，單身貴族的Jennifer自言一點也不寂寞：“我的朋友很好人，會叫我一齊過節，所以大時大節我都會黐住情侶或者夫婦食飯，哈哈！好似平安夜同聖誕節，我就連續兩日去做電燈膽，名副其實係聖誕燈飾。”