好市蓮藕湯

說時遲，那時快，眨下眼又就嚟到大年三十，當晚就最緊要一家人齊齊整整，食返餐豐豐富富嘅團年飯，安坐家中守歲跨年就最開心啦。不過老周我都明，大家唔少都係上班一族，年三十晚只得半日假，未必個個有時間煮九大簋。想簡單啲嘅，去街市買返條燒肉、斬隻雞、蒸返條魚再炒個菜，同樣可以做節，最重要係煲個好意頭嘅湯水。所以，今日我就教大家煲返個“好市蓮藕湯”，提早幾日祝大家發財好市，長賺長有，好事年年！

呢個湯水除咗意頭好，營養價值都唔差。煮熟咗嘅蓮藕性微溫、味甘，有補益脾胃、止瀉、益血嘅作用，大人細路都啱飲。所需準備嘅材料有蓮藕一斤、豬踭肉一斤、蠔豉四両、冬菇六隻、髮菜五錢、陳皮一片、薑切成小件。先用水將蠔豉浸發好；將蓮藕原條去皮，用水洗乾淨；豬踭肉汆水後，同樣要沖淨。然後將所有材料放入煲內熬煮約兩小時，取出蓮藕及豬踭切塊，再放少許鹽調味，一碗簡單又營養十足嘅意頭湯就大功告成啦。

周 中 （澳門美高梅金殿堂烹飪顧問）