槍法超群大熱開齋 佐真易爆冷標尾會

澳馬上周六賽事完結，大熱門勝出寥寥可數，挨年近晚賽果邪門難買中。華人騎師打爭氣波，全日有三人贏馬。余健雄憑馮廄“天域翱翔”及譚廄“寶寶”勝出一口冷孖，現以十八W續領風騷。但此子騎“天域翱翔”違例停賽兩日，於明年二月才服刑。陳卓鋒守齋逾兩個月，上仗憑“心中意”打破悶局，同日尚有“濠爽”及“海洋之星”闖入冷連贏，是仗取得一勝兩位，屬季內佳作。此外，牌仔張志立做替工開齋，騎錢廄“好友福”勝出今季首W。此子今季因傷遲上陣，季內出戰多場屢拼不逞，上仗贏馬信心大增，日後搏殺更得心應手。

洋將高君濤憑“槍法超群”食頭糊，尾場再爆“佐真易”，全日兩W標尾會，現以十一 W排名第五。此子季初慢熱，排名曾跌出十名外，近期漸入佳境，於十一月取五W，本月贏五W，表現愈戰愈勇。高君濤跑沙地向來煞食，除出閘準繩，騎前領馬能掌握步速，每可一放絕塵，鬥後勁亦有一手。上仗浩廄“槍法超群”出閘守住四、五位，全程亦步亦趨，入直路發力衝刺，埋門一網打盡，騎來掌握尺寸，大熱門順利開齋。“槍法超群”今季成熟長進，陣上走勢轉好，質新馬實力未知還有幾多，開竅後升班再來，續由高君濤主轡，有權添食。李森馬房“佐真易”上仗落班負頂磅作戰，高君濤出閘快步搶先，沿途走來半步不蝕，入直路憑後勁挫敵，爆十六倍冷W。此匹重磅馬騎來發揮水準，高君濤本年壓軸戲起孖標尾會。“佐真易”服役至今無打疊贏，下次出賽不宜追寶尾。