年度壓軸賽總投注逾六百卅萬

高君濤余健雄起孖

昨天上演的本年度壓軸戲順利完結。天晴地好，連場爆冷。馬會公佈總投注六百三十三萬八千元。

頭場跑出熱頭冷腳。高君濤騎浩廐“槍法超群”大熱掄元。此駒上次中野省吾跑千二米只得梗頸四。今次起用高君濤再拼，臨場捧成大熱。此子騎來淡定，出閘順利跟住三、四位，入直路發力衝刺，埋門將對手一網成擒，替馬匹取得來澳首W。高君濤、梁國浩攜手拔頭籌。

第二場牌仔張志立開齋。此子騎錢廄“好友福”後上挫敵，替馬房建功。“好友福”本配何華麟，但騎者晨操受傷退賽，改由張志立替補出戰。此子冷手執個熱煎堆，憑馬匹強勁衝剌後上取勝。錢廐喜添一W，張志立打開今季勝利門。

第三場余健雄贏馬。馮廐“天域翱翔”上次由余健雄跑千二米摘冠。今次原裝配搭增程至千五米乘勝追擊，騎者發揮上佳水準，再下一城。“天域翱翔”季內屢建奇功，水準穩定。馮廐添進帳，余健雄居功不小。

第四場余健雄爆冷起孖。此子贏完“天域翱翔”乘勢而起，是場騎譚廄“寶寶”以快放本錢退敵。此駒一向跑慣中短途，今次初跑千八米臨場成冷門，獨贏七十倍殺至對手一頸血。同場另一冷馬“海洋之星”闖入連贏，Q派逾二千，買中者好分。余健雄是日一口孖寶夠和味，龍虎榜上繼續領先。

第五場陳卓鋒贏馬。劉志森旗下“心中意”交其主轡，以留前鬥後戰術擒敵。此駒上仗陳卓鋒跑同程得第五無功而返。今次原裝配搭捲土重來，騎者出閘順利跟貼對手，入直路發力一攻而破，替馬匹取得今季首W。跑完獨贏得五倍，被人大注扑中。陳卓鋒、劉志森齊齊打破近期無馬贏悶局。

尾場高君濤爆十六倍冷W食尾糊。此子騎李森廐“佐真易”，以較佳留放後上取勝。此駒久無頭馬見面，今次落班配強搏殺。高君濤騎來有水準，替馬匹勝回一仗。李森廄本年度壓軸戲標尾會。高君濤是日兩W埋齋。