皇庭之寶重返勝途

高君濤掛帥擺明搏

澳馬本周休戰，至下周六才上演本年度煞科戲，是仗排位後攤凍逾十天，馬迷有大把時間做功課，圈中人部署出擊計劃亦可閂埋門傾掂佢。

本地兩屆冠軍騎師馬雅日前放棄牌照，明年一月份將在新加坡展開策騎新一頁。此子離去後盟主地位由誰人代替？今季外籍過江龍好手眾多，除巴西恩利克及鮑羅素是爭冠人物外，華將余健雄及何華麟亦具染指資格，尚有法國安萬堯可加入戰團，上述騎師季內表現不差，均具問鼎機會。此外，巴拿馬雙雄查維斯及高君濤亦不示弱，查維斯近期頻添進帳，演出漸入佳境，獲賀廄及兆廄支持，料賽至埋尾穩入前三名。高君濤近年位居前列，自從馬雅來了被剋住，連季爭冠軍亦俯首稱臣，馬雅離去後少了這位勁敵，今季能否重拾冠軍尚未知，預期至少可打入前五位。高君濤在澳策騎多年，表現水準穩定，跑沙地有一手，且出閘準繩，個別難騎之駒交其主轡，每有神來之筆，效力多廄亦廣結人緣，受練者器重，願供馬予其搏殺。

下周六草地日賽，第三場一二班千五米，錢健明馬房“皇庭之寶”同高君濤屬最佳搭檔，今次人馬重返勝途，可另眼相看。“皇庭之寶”上次千二米牌仔張志立執韁落敗而回，該仗途程不合，只視為熱身賽。拼後走馬換將由高君濤掛帥，應不會無的放矢。“皇庭之寶”千五米最佳出路，高君濤騎六次獲三勝兩位，上名率甚高。此番人馬重逢擺明搏殺，賽日可吼緊。