胡杏兒首次與細仔過聖誕

剛與幾位姊妹一起到馬爾代夫旅行返港的胡杏兒，昨日獲邀出席六福珠寶賽馬日並擔任主禮嘉賓，以一襲高貴白裙示人，配上閃亮珠寶，氣質高雅，猶如公主一樣。

杏兒早前與“胡說八道會”幾位姊妹成員去了馬爾代夫旅行七日，不時可見她們在社交平台曬靚相。杏兒說：“今年係一個大生日，安排咗好耐。初頭幾日天氣唔太好，只可以留在房間玩和傾偈。好彩後來天氣轉好，成班姊妹就瘋狂影相，因為實在太靚！今次係一個好好的回憶，希望下次可以六個人都去齊！”

聖誕節將至，杏兒表示已準備好為七月出世的細仔Ryan過首個聖誕節：“今年聖誕應該會同屋企人食飯，屋企的聖誕樹已砌好。第一次同細仔過聖誕，已經買咗聖誕衫畀佢，一定會一家人係聖誕樹前面合照留念，希望年年都影一張！”老公送上甚麼聖誕節禮物給她？杏兒笑說：“老公大時大節都會送珠寶，有紀念意義同時又可以保值。佢有時甚至會自己設計，再搵做珠寶的朋友幫手製作。”