美麗閃耀形勢大好

今日上演六場草地兼轉播八場澳洲馬，全日十四場又可過足癮。練者馮耀正近排頻添進帳，刻下馬房氣勢正盛。今仗只三駒出戰，個別屬牌面馬，且看可否有進帳。另路人馬賀蘭杜夫則大軍壓境，全日十駒強陣應戰，有力數糊。

賀蘭杜夫廄季初慢熱，馬房待至十月初始贏馬。開齋後食住度勢再上，於十一月份摘取五W，馬房氣勢轉旺。賀廄今季兵源有增，旗下質新馬可派用場。今仗十駒出擊，匹匹夠惡氣，馬迷不妨看重。

第一場：四五班千二米。“美麗閃耀”上仗埋門被“耀昌之星”頸位之微挫敗，飲恨第二，未竟全功，看走勢雖敗表現仍佳。質新馬日益成熟，拚後小休重來，原配馬雅再戰此程，應合腳法。今次抽到排二檔，形勢大好，出閘及時放順，有力直帶到底。

第四場：二三班千二米。“聯安神將”前仗同程入位，表現水準穩定。上次轉沙落敗，但未算脫節。拚後蓄銳再來，賽前備戰積極，論馬狀態好過上次。今仗續由黎昌全操刀駕輕就熟，復爭同程首本路，遇同組對手不多，坐位望贏可做到。

第六場：二、三班千二米。“莫特上校”同程連下兩城，愈贏愈易，擺明馬有質素。此駒早熟兼具好速度，拚後小休再來，今次續由恩利克主轡配搭完整。“莫特上校”有前有後，同程拿手好戲，此番挾兩捷餘威出擊，冀爭取三連冠。