冬天食花膠滋補暖身

寒流真係話嚟就嚟，呢幾日忽然凍咗好多，轉眼間我哋南方地區都踏入冬季。冬天一早一晚溫差大，身邊好多平時比較孱弱嘅朋友都已經大叫救命。

老周我就最鍾意冬天食花膠滋補暖身，尤其係用花膠嚟煲湯，不單只可以抵禦寒氣，補充優質嘅蛋白質，佢仲有好多骨膠原，係女士們最愛嘅養顏聖品。眾所周知，花膠係由各種海魚嘅魚鰾曬乾製成，有分好多等級，平時喺屋企或酒樓最常食到嘅就係俗稱“花膠筒”嘅鴨泡肚同鱈魚膠，比較經濟實惠；至於貴價貨方面，黃花魚魚鰾曬成嘅黃花肚因為夠厚夠大塊嘅關係，被譽為花膠中嘅極品。

點先為之靚花膠？最簡單就係睇佢表面係咪完整無缺，有無蟲蛀或損傷痕跡，表面發黑代表曬製時無清潔乾淨或儲存不當，煮出嚟會有腥味或苦味。另外，表面愈啞色、愈少光澤，代表年期愈長，品質就愈好。大家發花膠時，記住先用清水浸過夜，然後用薑葱水滾一滾，用同一煲水浸焗多一晚。雖然方法需時，但咁樣發出嘅花膠就更大塊，口感更好，攞嚟炒餸燉湯就更冶味。發完未食嘅花膠可以放冰櫃，遲吓解凍再煮都得。

（澳門美高梅金殿堂烹飪顧問）

周 中