卡通片壇活孖寶

日本卡通片壇有對活寶，乃宮崎駿與久石讓，一畫卡通，一配音樂。唔識？冇緊要，《風之谷》、《天空之城》、《千與千尋》、《龍貓》總會聞其名。設若從未睇過，坊間梗有段旋律熟口熟面，似曾相識。

久公係日本土砲，其作卻甚少東洋味，尤其旋律優美，一聽難忘，與故事、畫面匹配天衣無縫，因之造就宮崎峻卡通幾乎全球無人不曉。當年宮崎峻得聽久公音樂後，驚為天人，即據為御用，以後由佢全包配樂。

久公天資聰敏，四歲習小提琴，中學吹喇叭，大學作曲，畢業即為電影配樂。雖初涉影壇，然一鳴驚人，賣座電影無不搵佢配樂，於日本影壇早已響垛。後與宮崎峻一拍即合，成為孖寶。

久公崛起於扶桑，亦識得到大陸搵食。佢為姜文《讓子彈飛》配樂，大獲好評；其後《情癲大聖》、《姨媽的後現代生活》亦有佢份。

今日係久公六十九歲生辰。

西門公子