修哥評小田遊戲人間

“修哥”胡楓、陳敏之、王梓軒等前晚錄影《流行經典五十年》，節目前主持人黎小田因病離世，衆人談及合作時的點滴都眼濕濕。

跟黎小田相識幾十年的修哥，對老友離世感到非常唔開心，他指黎小田做童星時大家已認識：“因為大家不同公司，粵語片年代沒有正式合作過，後來佢轉做音樂人，就經常食飯及傾偈。”修哥稱幾個月前曾跟黎小田飯聚，當時他身體並無礙：“原本日前想去醫院探病，但其他朋友勸止我，叫我等消息。”修哥慨歎說：“呢個人吊兒郎當、遊戲人間，但寫曲好好聽。我叫佢得閒寫定，他會話：‘有人叫我寫，我會好快交到畀人，唔使寫定。’我就笑佢懶，佢就話：‘懶就懶啲，但冇所謂。’總括來講，呢個人過咗一個快樂人生。”

換上一身素服作為悼念的敏之心情難過，她眼濕濕地說：“呢個節目係屬於家燕姐同小田哥的。以前一齊做節目，小田哥仲坐我隔離化妝，所以對佢離開，我好唔開心，企上台會好掛念佢彈鋼琴。好開心曾經同佢合作節目，佢教咗我好多嘢，佢係對樂壇有好貢獻的前輩。”

敏之透露日前與家燕姐和胡諾言曾到過醫院探望黎小田，提起以前拍節目在司儀房的開心事，敏之説：“小田哥好愛錫家燕姐，兩人是對活寶貝。”