張慧儀大馬得獎衣錦還鄉

張慧儀日前遠赴馬來西亞吉隆坡出席第五屆世界傑出大師頒獎典禮，並獲頒亞洲傑出女藝人大獎及最佳服裝獎。當晚她穿上性感晚裝出席頒獎禮，笑說已做足打底措施：“我着晒打底褲，因為件衫真係好靚。要多謝設計師Daniel & Leslie專登為我做衫，最終得到最佳服裝獎，都算對他們有交代。”

張慧儀表示第二次在家鄉得獎大感光榮，笑言有衣錦還鄉的感覺：“因為第一次就係一九九二年國際華裔小姐冠軍，事隔二十幾年再次得獎，心情就好興奮！心情同當年都有好大分別，因為當時我立定決心要去香港發展，今次就係二十幾年之後，得到鄉親父老肯定我的工作，所以真係好興奮。”慧儀更揚言將全面復出：“我拎完獎之後，就要急急腳返香港，因為要開拍電影埋位啦。一直拍到過年，唞一陣就要拍電視劇，所以今年聖誕冇得放假，要等過年才可以返鄉下。”她也表示會巧妙安排工作時間，不會冷落愛兒：“我等佢返學時就努力工作，等佢放假、大時大節就一齊過囉！何況佢大個仔啦，要畀機會讓佢學習獨立。”