阿努納奇一網打盡

今日跑黃昏馬，頭場四點正響鑼。踏入季尾，練者冠軍之爭形勢漸趨明朗。馮耀正上周五晚增添一W，現累計三十九W，奪冠雖未百分百，但已坐定粒六。今仗只派兩駒應戰，似留力稍後衝刺。反而王君適七駒列陣，強陣出擊，值得重視。

王君適落後馮耀正廄十三W，今季奪冠應不存奢望，但仍有機會爭取亞軍。今日多駒出戰已有搏殺手影。今仗邀高君濤及安萬堯充當殺手，馬房已擺明要砌，此路人馬臨場可吼緊。

第二場：三四班千二米。“阿努納奇”前仗贏馬一條龍，上次爛地作賽一籌莫展，敗得無奈。拚後小休再下打磨功夫，今仗重配高君濤續跑千二米，若場地轉好應不同計。此駒質新當起，且前速夠快，欣逢路合，有權一網打盡。

第四場：三班千五米。“如意傳承”上仗同程贏得輕鬆，反映馬有實力。拚後匆匆再來，走馬換將用高君濤操刀配搭更強。馬匹季內愈跑愈好，能跟可鬥，現居此班實力足夠周旋。今仗高君濤倘發揮水準，有力再下一城。

第六場：三四班千二米。“鑽石博士”上次沙地首度入位，表現進步良多。拚後小休再磨，論馬有進無退。此駒質新具潛力，復跑千二米應合發揮，看今番備戰動態積極，幕後已具出擊意。路合檔佳，形勢大好，憑安萬堯駕輕就熟，可取勝此局。